विभिन्न स्थानमा पाँच जना मृत भेटिए

काठमाडौं। देशका विभिन्न स्थानमा पाँच जना मृत फेला परेका प्रहरीले जनाएको छ। दैलेखको नौमूले गाउँपालिका–८ चौराठाकी ४९ वर्षीया लक्ष्मी रिमाल सोही ठाउँको झिम्पेखोलामा बिहीबार मृत अवस्थामा फेला परेकी छन्।

नारायण नगरपालिका–७ स्थित गोरेटोबाट घर जाने क्रममा चिप्लिएर झिम्पेखोलामा खस्न गई खोलाले बगाएको खबर प्राप्त हुनासाथ जिल्ला प्रहरी कार्यालय दैलेख र अस्थायी प्रहरी पोस्ट लोहरे खोलाबाट खटिएको प्रहरीले खोजी गर्ने क्रममा उनको शव फेला परेको हो।

यस्तै, भक्तपुरको सूर्यविनायक नगरपालिका–७ गुण्डुकी ३८ वर्षीया माया नगरकोटी सोही ठाउँको जंगलमा बिहीबार मृतावस्थामा फेला परेकी छन्। १३ असारदेखि हराइरहेकी उनको खोजी गर्ने क्रममा शव फेला परेको हो।

प्रहरीका अनुसार झापाको गौरादह नगरपालिका–६ टगुवास्थित रतुवा खोलाको बगरमा टगुवा घर भई हाल दमक नगरपालिका–४ ताराबारी बस्ने ६५ वर्षीय भागवत शर्मा बिहीबार मृतावस्थामा फेला परेका छन्।

यस्तै, कपिलवस्तुको बुद्धभूमि नगरपालिका–१० लोहरौलास्थित पुलको छेउमा कपिलवस्तु नगरपालिका–११ बस्ने ५६ वर्षीय आशुतोषकुमार अग्रहरी बिहीबार मृतावस्थामा फेला परेका छन्।

यसैगरी सुनसरीको धरान उपमहानगर–८ हिमाली सामुदायिक वनभित्र खोल्सामा हाल नाम, थर, वतन नखुलेकी अन्दाजी ४५ वर्षीया महिला बिहीबार मृतवास्थामा फेला परेकी छन्। सबै घटनाबारे आवश्यक अनुसन्धान भइरहेको प्रहरीले जनाएको छ।

प्रतिक्रिया